کوردی      عربي       فارسی       English       Kurdi  
    
  فرۆکەوان ( ئایدن مستەفا خەتیب زادە) لەسەر ھەڵەبجە لەسێدارە نەدراوە!
شەماڵ عادل سەلیم
فرۆکەوان ( ئایدن مستەفا خەتیب زادە) لەسەر ھەڵەبجە لەسێدارە نەدراوە؟!


شەماڵ عادل سەلیم
لەگەڵ نزیکبونەوەی ساڵرۆژی ژەھربارانکردنی ھەڵەبجەی خێرلەخۆنەدیو، لێرەو لەوێ چەنین قەڵەمی نابەرپرس و بەبێ بەڵەگە لەچەندین شوێنی جیاجیا باس لەوە دەکەن کە گوایە عەقیدی فرۆکەوان (ئایدن مستەفا خەتیب زادەی تورکمان)، لەسەر ئەوەی کە بڕیاری (سەددام حوسێن)ی گۆڕبەگۆڕی ڕەتکردۆتەوەو  ئامادە نەبووە بەژەھر (ھەڵەبجە) بۆردومان بکات، بەبڕیاری (سەددام حوسێن) لەسێدارەدراوە، لەوەش زیاتر دەنوسن‌و دەڵێن کە گوایە (ئایدن) پێش لەسێدارەدانی وتویەتی: (ئاخۆ دوای لەسێدارەدانم کورد رێزم لێ دەنێت)!؟
تەنانەت لەم دوایەش ئەم ھەواڵە نادروستە لەچەندین ماڵپەرو تۆڕە کۆمەلایەتیەکان چەند بارە کراوەتەوە، بەڵام نازانم ئەو بەرێزانەی ئەم زانیارییە ھەڵەیە بڵاودەکەنەوە، خۆیان بێ ئاگادەکەن یاخود لەمێژو زۆر بێ ئاگانەو نازانن کە عەقیدی فرۆکەوان ( ئایدن) لەسەرەتای ساڵی( ١٩٨٧) واتە سالێک پێش ژەھربارانکردنی (ھەڵەبجە)ی خێرلەخۆنەدیو لەلایەن ریژێمی بەعسی فاشی لەسەر (بیروبۆچونی نەتەوایەتی)  گیراوەوو لەکانونی یەکەمی ساڵی ١٩٨٨ لەزیندانی (ئەبو غرێب) لەسێدارە دراوە.
بۆ سەلماندنی ئەو ڕاستییەی کە عەقیدی فرۆکەوان شەھید (ئایدن مستەفا خەتیب زادە) لەسەر ھەڵەبجە شەھید نەکراوە، پێم باشە سەرنجی خوێنەران بۆ ئەم خاڵانەی خوارەوە ڕابکێشم:
١ ـ  لەدیمانەیەک لەگەڵ کەناڵی ئاسمانی (تورکمان ایلی)دا، بەرێز ( تورکان قەساب پاشا) خێزانی شەھید (ئایدن)ی فرۆکەوان، ئەندامی ئەنجومەنی پارێزگای کەرکوک لەسەر لیستی بەرەی تورکمانی دەڵێت: ( شەھید (ئایدن) لەسەر خەبات‌و تێکۆشان‌و دڵسۆزی  بۆ نەتەوەی تورکمان لەساڵی ١٩٧٨ لەلایەن ریژێمی بەعس دەگیرێت‌و زۆر بەدرندەیی ئازارو ئەشکەنجە دەدرێت، لەکانوونی یەکەمی ساڵی ١٩٨٨ لەزیندانی ئەبو غرێب لەسێدارە دەدرێت) . 
٢ ـ  بەرێز (د. گورھان کتانە)، نوسەرێکی دیاری تورکمانی عیراقە، ھەروەھا یەکێکە لەدۆستە نزیکەکانی شەھید (ئایدن)و بنەماڵەکەی، لەرونکردنەوەیەکدا لە رۆژنامەی (ئەل قەڵعە)دا، بەتووندی ئەم زانیارییە ڕەتدەکاتەوە کە گوایە ناوبراو لەسەر بۆردومان نەکردنی (ھەڵەبجە )لەسێدارەدراوە.
( کتانە ) زۆر بەئاشکرا  دەڵێت : ( بۆمن و زۆرانی وەک من جێگای سەرسوڕمانە کە دەڵێن شەھید ( ئایدنی فرۆکەوان) لەسەر رەتکردنەوەی بریاری بۆمباباران کردنی (ھەڵەبجە )شەھید بووە ، ئاخر ئەو ھەواڵە  پێچەوانەی راستییە ، چونکە شەھید (ئایدن) لەسەر داکۆکی کردنی لە کێشەی ڕەوای نەتەوەکەی ( نەتەوەی تورکمانی ) ، لەلایەن ریژێمی بەعس و پێش کارەساتی (ھەڵەبجە ) بەساڵێک  گیراوە ،  دوای ساڵێک مانەوەی لە زیندان و رێک لە ١٩٨٨  لەسێدارە دراوە ) .
٣ ـ بەرێز (  فلاح یازار اوغلو ) کە ناسیارێکی نزیکی شەھید ( ئایدن ) ە ، لە ساڵرۆژی شەھیدبوونیدا نووسیویەتی ودەڵێت : شەھید( ئایدن) ، یەکێکە لە تێکۆشەرە دیارەکانی  نەتەوەی تورکمان و  شاری کەرکووک، لە ساڵی ١٩٨٧ لە سەر داکۆکی کردنی لە کێشەی ڕەوای نەتەوەکەی دەستگیرکرا و دووچاری ئازارو ئەشکەنجەیەکی زۆر بووەوە ، بەڵام کۆڵی نەداو سەربەرزانە  لە کانونی یەکەی ١٩٨٨ لەسێدارە درا ، شەھید (ئایدن) لە گۆڕستانی (المێلی ) لەلایەن کەس وکارو رۆلە بەوەفاکانی نەتەوەکەی  ، کە گیانی بۆیان بەخت کرد بەخاک سپێردرا ، دەبێ ئەوەش بڵێم ، شەھید ( ئایدن ) ،لەزیندانەوە  نامەیەکی بە دەستخەتی خۆی بۆ خێزان و رۆڵەتێکۆشەرەکانی نەتەوەکەی نووسیبوەو  تییایدا دەڵێت  : ( بۆ کەس و کارو سەرجە م گەلی تورکمان ، ھیوادار ھەمیشە وەک  من  سەربەرز بن ، من لەپێناو ئێوەدا خۆم و پلەوپایەم کردە قوربانی ). 
ئەم سێ بەڵگەیە  ئەوەمان بۆ دەسەلمێنێت کە عەقیدی فرۆکەوان ( ئایدن مستەفا خەتیب زادە ) وەک ھەزاران رۆلەی گەڵانی عیراق بەدەستی جەللادەکانی بەعسی فاشی  لەسەر بیروباوەڕی نەتەوایەتی خۆی ، نەک لەسەربۆردومان نەکردنی ( ھەڵەبجە ) لەسێدارە دراوە .
لەکۆتایدا، ھیوادارم ئەم ڕاستکردنەویە سودی ھەبێت و چی دیکە بەبێ بەڵگە زانیاری بڵاونەکەینەوە.
دەبێ بۆ میژوش ئەوەش بڵێم، تاکە رۆشنبیری غەیرە کورد کە بۆ ھەڵەبجە دلسۆزانە ھاتەدەنگ، زاناو لێکۆڵەرەوەو نوسەری بەناوبانگی عەرەبی  عیراقی (ھادی عەلەوی) بو کە بەئاشکرا نامەی پاکانەی نوسی‌و  داوای لێبوردنی لەھەڵەبجەو ھەڵەبجەییەکان کردو نیگەرانی خۆی لەو ستەمکارییە نیشاندا.
تمداد ديدنى ها:  470      تاریخ:  20/03/2017
هیچ کۆمێنتێک به‌رده‌ست نیه‌ .
کۆمێنتی خۆت بنێره‌  
   

   زیاتر
شەماڵ عادل سەلیم
1 بۆ 18 له‌ کۆی 268     
ماڵپه‌ڕی پێشوو ١
ماڵپه‌ڕی پێشوو ٢
    
Copyright 2012. All Rights Reserved.