کوردی      عربي       فارسی       English       Kurdi  
    
  وەفیق سامەڕائی تۆمەتباری ژمارە یەکی ئەنفال
وەفیق سامەڕائی تۆمەتباری ژمارە یەکی ئەنفال

عەلی مەحمود محەمەد


وەفیق سامەڕائی لە یەکەم ڕۆژەکانی ھاتنی بۆ کوردستان  لە ناوەڕاستی نەوەدەکانی سەدەی رابردوو, پاش ئەوەی پاڵەپەستۆکان لەسەر ڕژێم  توند دەکرانەوە,  ئومێدێک بە مانی ئەو ڕژێمە ڕۆژ لە دوای ڕۆژ تەنگتر دەبوەوە,  ئەو ڕۆژانەی کە وەفیق سامەڕائی وەک فریاد ڕەسێک بۆ سەرتاسەری عێراق سەیر دەکرا, ھێزە سەربازیەکان لە کوردستان دەخرانە بەردەستی گوایە سەدام دەڕوخێنێت, بەتالیۆن و تیپ و ھێزەکانی پێشمەرگە  لە خزمەتیدا بوون, بۆ ئەوەی کودەتای سەربازی لە بەغداد ئەنجام بدات, لایەنە سیاسیەکان دواڕۆژی سیاسی خۆیان لەسەر نەخشەکانی ئەو  بنیات دەنا, ئێمە لە" ڕێکخراوی ئاوارەو ئەنفالەکانی کوردستان"کەمپینمان لە دژی رێکخست بۆ ئەوەی چارەنووسی ئەنفالکراوەکانمان بۆ ئاشکرا بکات, تا ئەوکات ئەو کەمپینە بەرفراوانترین کەمپین بوو دژ  بە کەسایەتیەکی ئۆپۆزسیۆنی عێراقی لە پێناو دیاریکردنی چارەنووسی ئەنفالکراوان و بێسەروشێنکراوان بەڕێوە ببردرێت  " ئەوانەی ماندوو بوون بەو کەمپینەوە  سەرباری خۆم ( بەدرەدین حەمە ساڵەح, مامۆستا فەرھاد خالید, فەلاح حەسەن , سەرھەد تۆفیق , عادل قەشقە, ڕزگار مام بۆرە .... " داوامانکرد,ئەگەر وەفیق سامەڕائی ئەمڕۆ زانیاریەکان لەسەر تاوانی ئەنفال ئاشکرا نەکات,  سبەی لە بەعس خراپتر بە کورد دەکات, دیارە دەربڕین و ئاشکرا کردنی زانیاری لەسەر تاوانی ئەنفال, لە لایەن کەسێکەوە بە گووتەی تاوانبارانی ئەنفال, ئەندازیاری سەرەکی و نەخشە داڕێژەری ئۆپەراسیۆنەکە بوبێت ئەستەمە, ھەر واشیکرد.
ئەم واژۆیانەی خوارەوە,  بەشێکن لە  دەقی ئەو ھەڵمەتە,  بۆ فشار خستنە سەر وەفیق سامەڕائی, بۆ ئاشکرا کردنی چارەنووسی ئەنفالکراوان ئەنجاممان دا,کە لە ساڵەکانی ١٩٩٥-١٩٩٦ لە رۆژنامەکانی " کوردستانی نوێ, ئەمڕۆ, ڕێگای کوردستان –عەرەبی"  بڵاوکراونەتەوە:


 

 

ئەم واژۆیانە پارتی عێراقی  و  کوردستانی, پارتی دەسەڵاتدار و لە دەرەوەی دەسەڵات, بە  کوردی و عەرەبی و زمانەکانی دیکەش بڵاو کرایەوە, ڕجا و تکای دنیامان لە کەسی نزیکیەوە بۆی نارد, تەنھا لەسەر چارەنووسی ئەو کەسوکارانەمان لێدوانێک بدات, نھێنیەک ئاشکرا بکات و بدرکێنێت, ئەگەر ماون کەسوکاریان دڵنیا بکاتەوە, ئەگەر مردوون دیسانەوە با ئەو چاوەڕوانیە ئەبەدییە کۆتایی پێ بێت, تاکو بەشێک لە کەسوکاریان ژیانێکی سەرلەنوێ دەستپێبکەنەوە و لە چاوەڕوانی ئەبەدیدا نەژێن, وەلێ ئەم تۆمەتبارە تەنھا وشەیەکیشی نەدرکاند, ئاوڕێکی لێمان نەدایەوە, خۆی کەڕ و لاڵکردو گوێبیستی داواکارییەکان نەبوو, کەچی لەولاوە ھەزاران ھەزار کوڕ و کەسوکاری ئەنفالکراو خرانە خزمەتیەوە بۆکردە سەربازیەکانی, نە ڕجا دادی ھەبوو, نە فیغان و پاڕانەوەی کەسوکاری قوربانیان, لە کەلی شەیتانی بەعسیانە  نەھاتە خوارەوە, نھێنی رفەقای خۆی نەدرکاند,تاوانەکانی ئاشکرا نەکرد , یەک وشەشی لەسەر ئەنفال نەوت, ئادرەسی یەک گۆڕی نەدرکاند,  ئەمە چ دڵڕەقیەکە, ئەمە چ بەعسیەتیەکە نھێنیەکان تا ناو گۆڕ بپارێزیت, بۆیە ھەوڵەکانمان سەری نەگرت.

لە پاڕانەوەوە  بۆ  شەرمەزارکردن

وەفیق سامەڕائی بە پەیوەست بوونی بە ڕیزەکانی ئۆپۆزسیۆن پێش روخانی بەعس  لە ھەموو تاوانەکانی پاک نابێتەوە, ئەگەر لایەنی سیاسی کوردی لە مافی خۆیان بە بەرژەوەندی خۆیان خۆش بن, کە بەوەشەوە نەوەستان, کرایە راوێژکاری سەربازی سەرۆک کۆمار,  ئەوە دادگاییە دەتوانێت پاکی ئەو و بێبەری بوونی لە تاوانەکان یەکلا بکاتەوە لە بەرامبەر مافی قوربانیان, لێبوردنی کەسوکاری قوربانیان تەنھا لە ئەنجامگیری بڕیاری دادگایەکی سەربەخۆی ئازادەوە دەبێت  بەوەی بڕیار لەسەر بێتاوانی گومانلێکراو بدات, یاخود لە پرۆسەی ئاشتەوایی وەک باشوری ئەفریقا, ئەویش دوای داننان بە سەرجەم تاوانەکان و داوای لێبوردن کردن, لە پرۆسەی ئاشتەواییدا ھەر کەسە وەک خۆی دەرەکەوێت, تاوانبار وەک تاوانبار, قوربانیش وەک قوربانی, رۆڵ گۆڕینەوە بوونی نییە, وەک لە ئێستای کوردستان بۆتە دیاردە .
لە ساڵی ٢٠٠٢ ەوە گەشت و ھەڵمەتی ئاشکراکردنی تاوانەکانی وەفیق سامەڕائی لە لایەن کەمپینی ھەڵەبجە و ئەنفالەوە دەستیپێکرد  کە دواتر ناوەکەی گۆڕا بۆ ناوەندی چاک و دواتر چاودێری کوردۆساید, کە بەندە بە ھاوکاری بەڕێز پرۆفیسۆر ج ق بەڕێوەی دەبرد, ھەر لەو کاتەشدا لایەنە شیعەکان بەھۆی پشکداری ناوبراو لە سەرکووتی ڕاپەڕین بەتایبەتیش بەشداریکردنی لە سەرکووتکردنی راپڕینی ساڵی ١٩٩١دا, دەستیانکرد بە ھەڵمەتی کۆکردنەوەی زانیاری لەسەر تاوانەکانی ناوبراو و شەرمەزارکردن و بەرەو بە دادگاییبردنی, بۆ ئەو مەبەستەش ئەو فایلانەی پەیوەست بوون بە تاوانەکانی وەفیق سامەڕائی دران بە کەمپینی ھەڵەبجە و ئەنفال "  ھاوکات پەیوەندی بە پارێزەرەوە کرا لە لەندەن بۆ تۆمارکردنی سکاڵای فەرمی لەسەری, لەو کاتە ھیچ کەس و لایەنێک  پشتیوانیان  لەو ھەڵمەتە ناکرد  بگرە بەھۆی نزیکی ناوبراو لە ینک  ەوە  زۆر تانە و تەشەر  و بووختانیش  بۆ  ھەڵمەتەکە ھەڵدەبەسترا,  جگە لە کاک  دکتۆر  ج  ق  نەبێت  کە ھاوکاریەکی  زۆری کردم لە وەرگێڕانی بەڵگەنامەکان بۆ زمانی کوردی و نووسینەوەی بەیانامەکان بە زمانی عەرەبی و بڵاو کردنەوەو داڕشتنەوەیان.
لە خوارەوە نموونەیەک لەو   تاوانانەی وەفیق سامەڕائی , کە لە کاتی خۆیدا بڵاومانکردەوە دەخەمە بەردەستتان :

 " بەناوی خوای گەورە و میھرەبانەوە ئیفادە من رائیدی پیادە عەبدولستار حوسێن عەبود ئەلحمیرییە کە لە فرقەی (٢٨) دانراوم سەر بەلیوای پیادە(٧٠٥) ی فەیلەقی یەکەم ، بەو پێیەی کە وەکیلی ئامر فەوجی یەکەم و ئەفسەری پەیوەندی بە کەرتەکانەوە بووم ، بەڵێن دەدەم لەبەردەم دادگای نێودەوڵەتی بۆ دادگایی کردنی تاوانبارانی جەنگ وقەڵاچۆکردنی رەگەزی مرۆڤ ئامادە بم بۆ ئیفادە دانم ، چونکە من شایەت حاڵی پرۆسەکانی لەناوبردن و کوشتن و وێرانکردن بووم لەشاری ھەڵەبجەو لە کردەوەکانی ئەنفال و ئامادەشم بۆ زانیاریدان و بەناوەکانەوە لەبارەی ئەو تاوانانەوە. ئیفادە پلە: رائید( پیادە) ناو: عەبدولستار حوسێن عەبود ئەلحمیری پۆست: وەکیلی ئامر فەوجی یەکەمی ئەفسەری پەیوەندی کەرتەکان یەکە : لیوای (٧٠٧) فرقەی (٢٨) فەیلەقی یەکەم دەمانەوێت تەواوی ئەو زانیارییانەی کە تایبەتن بە تاوانەکانی لیوای روکن وەفیق سامەراییەوە رابگەیەنین: * لەساڵی (١٩٩٠) وەکو بەرپرسی لێژنەو ھۆبەی لێکۆڵینەوەی ورد دامەزراوەو کاتێکیش راپەرین کراوە ، سەدام فەرمانی پێکھێنانی ( لێژنەی ئیعدامات) ی لە ناوچەکانی باکوور بەسەرۆکایەتی لیوای روکن وەفیق سامەرایی داوە ، ئەو لێژنەیە ژمارەیەک ئەفسەری ئیستخباراتی لەخۆگرتبوو لەوانەش عەمید مەروان خزەیر کازم کەناوبراو بە فەرمانی وەفیق سامەرایی ژمارەیەکی زۆری ھاوڵاتیانی کوردی لە ئافرەت و مندالڕ ھێناوە کە ژمارەیان زیاتر لە (٤٥٠) کەس بووە و لە مەعسکەری خالید ئیعدام کراون و بۆ شاردنەوەی ئەو گۆرە بەکۆمەڵەش بارەگای قوتابخانەی کۆشتنکاری مەعسکەری خالیدیان لەسەر بنیاتنناوە . *
لەدوای دەرچوونی سوپای عێراقی لە کویت ئەرکی بەڕێوەبەرایەتی ئیستخباراتی عەسکەری بە لیوای روکن وەفیق سامەرایی سپێردرا لەجێگەی بەڕێوەبەری پێشوو ( تەڵعەت نووری )، یەکەم کردەوەش کە وەفیق سامەرایی ئەنجامی دا گومان کردن بوو بە سەرکردە عەسکەرییەکانەوە لەوانەش لیوای روکن ( عیسمەت سابر) سەرۆکی ئەرکانی کردەوەکانی کەنداوی عەرەبی ، و بەھۆی ئەو راپۆرتانەش کە سامەرایی لەسەری نووسیوە و بۆسەدامی بەرزکردۆتەوە ، لیوا روکن عیسمەت سابر ئیعدام کراو کۆمەڵێک ئەفسەری دیکەش دەستگیرکران لەوانەش لیوای روکنی ئەوکات کامل ساجت ئەلجەنابی. * لەبارەی راپەرینەکەی قەزای سدەتولھیندییەوە ، ئەوا لیوا روکن وەفیق سامەرایی سرییەی یەکەمی لە سەرکردایەتی ھێزەکانی ئەلعابد ( حەرەس جمھوری) ئیعدام کرد بەھۆی ئەو گۆمانەی کەلە ئامری سرییەکە موقەدەم ( عەبدوڵڵا ترکی حتحوت ) ھەیبوو ، بۆیە ئەو تەواوی سەربازانی سرییەکە ئیعدام کران.
ئیفادەی موستەشارە کوردەکان ئیفادەی (م. گ. ش) : لە بەراوی (١٠/٦/١٩٨٨) موختاری گوندی کەندک جەلال لە قەزای زاخۆ بە رائید ئەحمەد حەسەن مستەفا ئەفسەری ئیستخباراتی سەرکردایەتی ھێزەکانی عومەر عەبدولعەزیز راگەیاند کە (١٩) ھەڵاتوو ئەوانەی کەدەیانەوێت بگەڕێنەوە گۆندەکانیان بەگوێرەی بڕیاری لێبوردنی ئەنجومەنی سەرکردایەتی شۆرشەوە. رائید ئەحمەد حەسەن بەھێزێک کە لە چوار سرییەی مغاویر پێکھاتبوو گەیشتنە گوندەکەو داوی ئەوەی بەفێل ئەوانەی لەوە دڵنیا کردەوە کە بڕیاری لێبوردن دەیانگرێتەوە ، ھەر (١٩) کەسەکە تەسلیم بوون ، رائید ئەحمەد حەسەن مستەفا رێنماییەکانی ئامری مەفرەزی ئیعدام ( وەفیق سامەرایی ) خوێندەوەو ھەر لەوێش ئەو (١٩) کەسە ئیعدام کران.
ئیفادەی موستەشار (ا.ا. ح. الب): لەسەرەتای قەسابخانەکانی ئەنفالەوە ، وەفیق سامەرایی فەرمانی دا بە عەمید محەمەد یاسین ئەلجبوری ئامری ھێزی دووەمی لە تەق تەق بە وێرانکردنی گوندەکانی سەر بە کۆیە و دەستبەسەرداگرتنی مەڕو ماڵات و کۆکردنەوەی خەڵکانی ئەو گوندانە و گواستنەوەیان بۆ بارەگای سەرکردایەتی فەیلەقی یەکەم، ژمارەی ئەو گوندانەش (٢٠) گوند دەبوون . رائید سلێمان بەڕێوەبەری ھۆبەی مەنزوومەی باکوور لە ھەولێر (١٩٨٤-١٩٩١) لەنێو ئەو دەستبەسەرانەی ئەو گوندانەوە دەگەڕاو گومانی لە کوێ بکردابوایە دەستگیری دەکرد و بەپێی فەرمانەکانی وەفپق سامەراییەوەش یەکسەر حوکمی ئیعدامی بەسەر جێبەجێ دەکرد ، بۆیە لەپێش چاوی خەڵکی و بە وجوودی منیش دوو کەس ئیعدام کران بەناوی: ١ـ حاجی جاجی ئاغا. ٢ـ مەعرووف ئیسماعیل رەزا. " .

بڵاوکردنەوەی چەند جارەی ئەم ئیفادانە, بە زمانی کوردی و عەرەبی , ویژدانی پارتە کوردیەکانی نەجوڵاند, واداریانی نەکرد بەوەی دەست لە ھاوکاری و پشتیوانی ئەو  تۆمەتبارە ھەڵبگرن  تاکو لە ڕێگەی دادگاوە ئەم گومانانە یەکلا دەبنەوە.


بۆچی دان بە تاوانەکان نانێن ؟

ئەم تاوانانەی لە سەرەوە  ئاماژەمان پێیان دا, لەگەڵ ئەو بەتاوانبارکردنەی لە دادگا لەسەر زاری تاوانکارانی ئەنفالەوە ڕاگەیەنران, دەکرێت لە دادگا یەکلا بکرێنەوە, وە خاوەند  ئیفادەکانیش بانگ بکرێن بۆ دادگا بۆ ئەوەی شایەدیەکانیان دوبارە پێشکەش بکەنەوە,  لە ڕاستی شایەدیەکانیان بکۆڵرێتەوە, مەرجیش نییە ھەموو ئەم ئیفادانە لە دوای لێکۆڵینەوە  ڕاست دەرچن, یاخود  وەفیق سامەڕائی تاوانباری یەکەم بێت لە ئەنجامدانیان  و بکەریان بووبێت, وەلێ لە ئاکامی لێکۆڵینەوەو دەرکەوتنی ڕاستیەکان, کەسانێک دەردەکەون لە پشت ئەنجامدانی ئەم تاوانانەوەن, گرنگ ئەوەیە خودی تاوانەکان ئاشکرا بکرێن , تاوانبار ھەر کێیەکە  سزای خۆیان وەربگرن, لە رێگای دادگاوە  تاوانەکان بە دۆکۆمێنت بکرێن, کورد ھیچ کێشەیەکی شەخسی نە لە گەڵ وەفیق سامەڕائیدا ھەیە  نە کەسی دی, ئەوەی ھەیە تاوانکار نابێت لە سزا رزگاری بێت.
ژمارەیەکی ئێجگار زۆر لە بەرپرسانی سەربازی و ئەمن و ئیستخبارات و بەعسی گلاونەتە ئەو تاوانانەی بەرامبەر بە نەتەوەی کورد ئەنجامدراون , یەکێک لەوانەی گریمانەی ئەوەی لێدەکرێت ڕۆڵی پێشەنگانەی لە ئەنجامدانی ئەو تاوانانەدا ھەبوبێت, بە حوکمی جێگە و پێگەکەی لە ھەرەمی دەسەڵاتداریدا وەفیق سامەڕائییە,  بێشک  لەو پێگە گرنگەوەی و دەسەڵاتیش بەو ھەموو دڕندەیەوەی ھەر  گلاوەتە بەشێکیەوە, ئەمە دادگا یەکلای دەکاتەوە, وەلێ تا ئەوکاتەی بە ھەڵاتووی لە بەرامبەر دادگا دەمێنێتەوە ئەوا گومانەکان زۆرن و زیاتر وەک تاوانبار دەرە کەوێت .


سکاڵا تۆمارکردن  لە وەفیق سامەڕائی

دیسەمبەری ساڵی ٢٠٠٦  لە سەردانم لە ھۆڵەنداوە  بۆ کوردستان کە ھێشتا لە ماندوویەتی  ڕێگا دوورو درێژە ٤٠٠٠ کم یەکە بە ئۆتۆمۆبیل  نەحەسابومەوەو ماندویەتی رێگا دورو درێژە  دەرنەچوبوو ,  لە ئاکامی ٤ ڕۆژ  گەشتی  بەردەوامی شەو ڕۆژ ڕێکردنی بێپشوو و بەردەوامی ناو ئۆتۆمۆبێل, لە ناکاو زەنگی تەلەفۆنەکەم  لێی دا, وتیان ڕاستە بەڕێزت ھاتوویتەتەوە بۆ کوردستان بۆ بە دادگایی گەیاندنی وەفیق سامەڕائی؟, وەک  لە مانشێتی ڕۆژنامەی کوردستان ڕاپۆرتدا نووسراوە ", گوایا وەفیق سامەڕائی  لە لایەن ئیوەوە دەدرێتە دادگا " پرسیارێک لە ناکاو بوو بۆ من و   قەت لەو لەحزەیە چاوەڕوانیم ناکرد, ئاوا بە خێرایی بەرەو روی ببمەوە, وە خۆشم ئامادە نەکردبوو بۆ وەڵامدانەوەی پرسیاری قورسی  لەو چەشنە, ھەرچەندە پێشتر لە کۆبونەوەی ناوەندی چاک لە پاڵتاک  ئەو بڕیارەمان دابوو  وە منیش ئەو بەڵێنەم دابوو لە کاتی گەڕانەوەم بەس بوار ھەبێت جێبەجێی بکەم,بەڵام بەو خێراییە نا,لە وەڵامدا بێ دوو دڵی وتم : بەڵێ ڕاستە , ھەرچەندە من ئەو  ژمارەیەی کوردستان ڕاپۆرتم بەرچاو نەکەوتبوو کەھەواڵەکەی بڵاوکردبوەوە, وە  ئاگام لە بڵاوکردنەوەی ئەو  ھەواڵە بەھیچ جۆرێک نەبوو  کە کاک قادر نادر پێیانی دابوو,  چاوەڕوانیشم ناکرد شتی وا بەو زوییە بڵاو بکرێتەوە, ئەگەر پرسیان پێم بکردایە نام ھێشت بڵاوبکرێتەوە, بەتایبەتیش لە مانشێتی ڕۆژنامەیەکەوە ڕابگەیەنرێت, ھەواڵەکە زۆر گران بوو بۆ من  و  خستمیە بەردەم ھەوڵی جدییەوە  بۆ بە پراتیککردنی, بۆ ھەنگاوی یەکەم دەبوایا پارێزەر پەیدا بکرێت, ئەمەش گران بوو بتوانرێت پارێزەرێک   پەیدا بکرێت, بۆ  بە دادگایی گەیاندنی کەسایەتیەک " موستەشاری سەرۆک کۆمار بێت " لەو کاتەدا کە ترس زیاتر بوو وە ھێشتا مانگی ھەنگوینی جەماوەر لەگەڵ ئەو پۆستە لە پۆپەدا بوو,  کەس لە پارێزەران  ئامادە نەبوون  شان بدەنە  شانی ئەو کەیسە گەورەیە, بەرێزێک  کە زۆر قسەی گەورە لە بارەی ئەنفالەوە دەکات, پێم وت: خەریکی کارێکی وام , وتی تەداخولی کاری وا ناکەم و ناوێرم, ئەوکات ھێشتا سامی دەسەڵات نەشکابوو, تەنھا چەند کەسێکی یاخی بوون خۆمان لە قەرەی ئەو شێوە کارانە دەدا,بە پەلە گەڕامەوە ھەولێر بۆ ڕاپەڕاندنی کارەکە.
کاک قادر نادر کە سەرچاوەی مانشێتەکەی رۆژنامەی کوردستان ڕاپۆرت و ھاندەر و پاڵنەری سەرەکیم بۆ ئەو کارە وتی : کاک گۆڤەند بابان ئامادەیە پارێزەریمان بۆ بکات بە خۆڕایی, بەم شێوەیە توانی پارێزەریش دابین بکات, منیش لە دوای گەڕانەوەم بۆ ھەولێر,  یەکسەر چووم بۆ  لای کاک گۆڤەند کە زۆر ئازایانە ھاتە پێشەوە  و  وەکالەتێکم بۆی کرد:
 


نابێت بۆ مێژوو ئەوەشم لە یاد بچێت , ھاوڕێی خۆشەویستم " رزگار مام بۆرە  " لەو کارە , وەک ھەمیشە تا سەر ھاوڕێم بوو , یەک لەحزەش لێم دانەبڕا, تاکو تەواوی کارەکانم ئەنجامدا, واتا لە دەرەوە جگە لە تەواوی رێکخراوەکەمان چاودێری کوردۆساید بە تایبەتیش  قادر نادر لە ناوەوەش  رزگار مام بۆرە  و کاکە گۆڤەند بابان تاکە پشتیوانم بوون, کەسی دی شانی نەدایە بەر.
لە گەڵ رزگاردا لە بازاڕەوە  کە چووین بۆ سەر ڕێێ کۆیە بۆ فەرمانگەی دادنووسی دووەمی ھەولێر, شۆفێری تاکسیەکە کرێی ڕێگاکەی  لێمان نەسەند, وتی دەتناسم و دەست خۆش بۆقسەکانت ھەموو جارێک لە تەلەفزیۆنەوە دەیانکەیت, چوینە لای عەریزە نووس ھەقی دەستیان نە سەند وتی سەربەرزم بە نووسینی ئەم عەریزەیە, خاوەند فۆتۆکۆپی  بە ھەمان شێوە وتی : لە ئاست ئەم کارە گەورەیە چۆن پارە وەردەگرم , ڕێمان دەکەوتە لای ھەر کێیەک  بۆ تەواوکردنی کارەکە, ھەمووی دەرگای دڵیان بۆمان دەخستە سەر گازی پشت و کارەکەیان بێ بەرامبەر بە  خۆڕایی ئەنجامدەدا, ھەموو لە ئێمە گەرمتر بوون بۆ دۆزەکە,  بە پەرۆشتر بوون بۆ ئەنجامدانی کارەکە, ھەڵوێستکانیان ھێز بەخشین بوو بۆمان .
ڕۆژی ٦-١٢-٢٠٠٦, کاتژمێر ١٠,٣٧ خولەک لە دادگای ھەولێر و کابینەی عەریزە نووسی و فۆتۆکۆپیەکانەوە,  سکاڵامان نووسی , بە ھەمان شێوەی ئەوانی پێشووتر, تایپێست و خاوەند کۆپیەکە بێبەرامبەر ئەنجامیان دا, وەک لە خوارەوە ناوەڕۆکەکەی  ھاتووە , عەریزەیەکی تاکو بڵێی  سادە, وەلێ  کاریگەر, عەریزەیەک لە دەرگایەکی بەرینەوە چووە مێژووی دادگایی تاوانبارانەوە, بۆ ھەتا ھەتایە سکاڵا لێکراوی خستە ڕیزی تاوانبارانەوە, تەنھا دادگا دەتوانێت پاکی بکاتەوە:

 
چەند خولەکێک لە کاتژمێر ١٢ ی نیوەڕۆ لایداوە, بە پەلە لە ترسی تەواو بوونی دەوام, لەگەڵ " ڕزگار مام بۆرە ",  بە پەلە تاکسیەکمان گرت و سکاڵاکەمان  برد بۆ نووسینگەی ھەولێری   دادگای باڵای تاوانەکان , لەوێندەرێ سکاڵانامەکەیان   زۆر بە سارد و سڕی و سادەیی لێم وەرگرت , لە کارەکە کەوتمە گومانەوە, لە دڵی خۆمدا وتم ئایا بەم سادەییە سکاڵا لە کەسایەتیەکی وا کاریگەر و گەورە دەکرێت؟, بەو بەڕێزەی سکاڵاکەی لێم وەرگرت وتم: پارچە کاغەزێکم بدەنێ لە بەرامبەر ئەم سکاڵایەی تۆمارم کردووە, ئەو بەڕێزەی سکاڵانامەکەی لێم  وەرگرت  وتی: بە سەرچاو, خەمت نەبێت دەیگەیەنینە جێگەی خۆی ,  ئەم پارچە کاغەزۆکەی  خوارەوەشی  پێم دا :


 

کە ئەو پارچە کاغەزۆکە سادەیەم بینی , زیاتر کەوتمە گومانەوە, لێ ئێستا ٦-١٢-٢٠٠٦ کاتژمێر ١٢,٤٣ خولەکەو بە فەرمی سکاڵا لە ئەندازیاری ئەنفال وەفیق سامەڕائی تۆمار کراوە, دادگا ڕەوتی ئاسایی  خۆی وەرگرتووە ,  لە دوای گەڕانەوەم لە کوردستانەوە  بۆ ھۆڵەندا,  ناوەندی چاک بەیاننامەیەکی  لەسەر ئەم سکاڵایە بە ھەردوو زمانی کوردی و عەرەبی بڵاو کردەوە کە کاک ھیشام ئاکرەیی نووسی,  خۆشبەختانە  ڕۆژنامەی شەرق ئەوسەتی لەندەنی, ڕۆژی دواتر بەیاننامە عەرەبیەکەی  بڵاوی کردەوە, ھاوکات منیش چەندین جار پەیوەندیم کرد بە دادگای باڵای تاوانەکانەوە,  ڕایان گەیاند سکاڵاکەمان  گەیشتووەتە شوێنی مەبەست .
کاتێک دادگای باڵای تاوانەکان بڕیاری دادگای لەسەر تاوانباران  خوێندەوە , لیستی بانگ کراوان بە  وەفیق سامەڕائی دەستی پێکرد, ئەمەش دەربڕی ئەوە بوو , سکاڵای ھەموو ھاووڵاتیەک لە بەرامبەر ھەر دەسەڵاتدارێک چەندە بەرز بێت  شوێن خۆی دەگرێت, ئەگەر دادگاکە جدی بێت.

لە دوای ئەوەی وەفیق سامەڕائی ناوی لە ڕیزی لیستی تاوانکاران  وەک تۆمەتباری ریزبەندی ١ ھاتەوە, لە ترسان لە  عێراق ھەڵات و پۆستە باڵاکەی بەجێھێشت, لە سەرەتادا لە ھەموو بۆنەو دانیشتن و چاوپێکەوتنەکان بزر بوو , لە ژیانی سیاسی ئەم وڵاتە فڕێدرایە دەرەوە, شوێن ژیان خۆی گۆڕی,بەڵام دوایی  کە بڕیارەکانی دادگای باڵای تاوانەکان  کاری پێ نەکرا ئەویش کەم کەمە ھاتەوە  سەر خەت و لە راگەیاندنەکان دەرکەوتەوە ,  لێ تازە بۆ ھەتا ھەتایە تارمایی ئەنفالکراوان بەسەر سەرییەوە دەبن و بڕیاری ناڕەوای دادگا و شەفاعەتی خیانەتکارانەش لە لێپرسینەوە نایپارێزن, دەستی دادپەروەری ھەر پێی دەگات, ھەنگاوی یەکەم لە ڕێگای ئەم عەریزە سادەیەوە,  لە ژیانی سیاسی عێراق دوورخرایەوە, تاکە پاکبونەوەی تەنھا لە ڕێگای بێتاوانکردنیەوە لە دادگای باڵای تاوانەکانەوە دەبێت .
ژمارەی بینین:  617      بەروار:  08/04/2018
هیچ سەرنجێک بوونی نیە‌ .
تکایە سەرنجەکەت لێرەوە بنێرە  
   

ماڵپه‌ڕی پێشوو ١
ماڵپه‌ڕی پێشوو ٢
    
Copyright 2012. All Rights Reserved.