کوردی      عربي       فارسی       English       Kurdi  
    
  9 که‌سایه‌تی ناوداری سوێدی له‌ سیاسه‌ته‌مه‌دار و ئه‌ندام په‌رله‌مان و ڕۆژنامه‌نوس وداکۆکه‌ری خه‌باتی کۆمه‌لکوژی ده‌بنه‌ ئه‌ندام

لەئەرشیفەوە:

 یەکێک لە و کارو چالاکیانەی کە کۆمیتەی سوێدی چاودێری کوردۆساید /چاک خەباتی خۆی لەسەر چرکردۆتەوە، لەدەرگادانی دامودەزگا سیاسیە سوێدیەکانی بووە، بۆ ناساندنی تاوانە کۆمەلکوژیەکانی دژ بە گەلەکەمان، ھەربۆیە یەکەم کەمپین  بۆ بە جینۆساید ناساندنی  تاوانە کۆمەلکوژیەکانی دژبە کورد، لەم وڵاتەدا ، لەئۆکتۆبەری ٢٠٠٦ دەستی پێکردو خۆشبەختانە ٤٢ ئەندام پەرلەمان، ٣ پارت، ٣ سەرۆک حزب و دەیان کەسایەتی سوێدی واژۆیان لەسەر کرد .سەرباری سازدانی کۆنگرەیەک لەسەر تاوانی ئەنفال لە پەرلەمان و پێشکەش کردنی یەکەم یاداشتنامە بۆ پەرلەمانی سوێد بە واژۆی ٥ پەرلەمانتاری ٥ پارتی جیاجیای سوێدی کە دان بەتاوانی کۆمەلکوژی دژ بە کوردان بنێن .
 ئەمڕۆش لەھەلمەتێکی تری کۆمیتەکەماندا، بۆ ناساندنی زیاتری  کەیسی کۆمەلکوژی کورد، تائێستا  توانیومانە  ٩ کەسایەتی سوێدی لەسیاسەتمەدار، ئەندام پەرلەمان، ڕۆژنامەنوس و خەباتکەری دژ بەتاوانی کۆمەلکوژی بکەینە ئەندامی فەخری چاودێری کوردۆساید، کەلەمەودوا وەک نوێنەری ئێمە وبنەماڵەی قوربانیانی کۆمەلکوژی دژ بە کورددەبن و زیاتر بەتەنگ جولاندنی ئەو کەیسە لەبیرکراوە دا دەچن. لەلایەکی ترەوە، ئەم بەئەندامبونەی ٩ کەسایەتی سوێدی ئاستی  سەنگ و خەباتی چاک لەم ولاتەدا نیشان دەدات ، بەوەی کە یەکەم جارە لەمێژوی گەلەکەماندا پۆلێک کەسایەتی ناوداری ولاتێکی ئەوروپی رەزامەند بن لەئەندامبونیان لە ڕێکخراوێکی کوردستانیدا.
 
 

 ناوی ئەندامە کان:
 
 ١.    ھێلێنا سڤێنتەسۆن . ژنە خەبات کەری دژ بە کۆمەلکوژی گەلان، کەلەبنەچەدا جولەکەیە سەرجەم بنەمالەکەی بەدەستی نازیەکانی ئەلمانیا لە جەنگی جیھانی دووەمدا لەناو چوون. دکتۆر ھێلێنا نزیکەی ٥٠ سالە بەردەوام خەبات بۆ ناساندنی تاوانی ھۆلکۆستی جولەکە دەکات و لەولاتی سوێدیش نزیک بە ٤٠ سالە لەگەل ٥٠ ھاوڕێی بەردەوام سەردانی ناوەندە زانستگەو خویندگاکان دەکەن بۆ باسکردنی تاوانی ھۆلۆکۆست، ھاوکات دۆستێکی دێرینی کوردەو لەسالی ١٩٩٢ بەدواوە  ھاریکاری منالانی کورد دەکات و سەنتەری لەھەولێر و سلێمانی ھەیە لەم بارەوە ٦٠ منالی بێ باوک و دایکی ئەنفالکراو ی کورد ، ١٨ سالە ئەو بۆتە دایکیان و  بە خێویان دەکات ، ھاوکات یەکێک لەدامەزرێنەران و دەستەی کارگێری  ڕیکخراوی قەندیل لە کوردستان
 ٢.    ستێڤان ھیرتن،  رۆژنامەنوسی بەناوبانگی سوێدی  و یەکێک بووە لە کادیرە بەتوانایانەی ئاژانسی دەنگ و باسی سوێد.TT.  ‌خاوەنی چەندین راپۆرت و ھەوڵە لەسەر کێشەی کورد بەگشتی و مەسەلەی کۆمەلکوژیەکەی بەتایبەتی، ھاوکات یەکێک لەو گروپە ڕۆژنامەنوسە بیانیە بووە کەلە پێنجەمین ڕۆژی دوای  کیمیابارانی ھەلەبجە سەردانی ئەم شارەی کردووە و بەوێنەکانی توانیویەتی تاوانی کوشتاری بەکۆمەلی دژ بە کوردان بە جیھان بناسێنێ و یەکێک لە گەواھیدەرەکانی دۆسیەی تاوانی ھەڵەبجە بوو‌ە لە دادگای تاوانی عیراق .
 ٣.     بۆدیل سیبلۆس، ئەندامی پەرلەمان و بەرپرسی بەشی ئەنتەرناسیۆنالی پارتی ژینگەی سوێدی لەپەرلەمانە و ھاوکات دۆستێکی دێرینی کوردی ھەمو بەشەکانی کوردستانە و بەردەوام لەگەل  ئازاری کێشەی کوردستانی گەورە بەھەمو بەشەکانەوە دەژیت و ئێستاش ئەندامی یەدەگی پەرلەمانی ئەوڕپایە. دەبێت ئەوە بلێین بەردەوام لەتاوانە کۆمەلکوژیەکانی دژ بە کورد وەک نوێنەری کورد و قوربانیان بووە لەپەرلەمان .ھەروەھا ‌ئەو یەکێک لەو ٥ پەرلەمانتارە بوو کەلە ٢٠٠٧/٠٩/٢٣ دا یاداشتێکیان دا بەپەرلەمانی سوێد کە ‌تاوانی کۆمەڵکوژی دژ بە کوردان بە جینۆساید بناسرێت.
 ٤.    یاکوب یونسۆن، ئەندامی پەرلەمانی سوێد لەسەر لیستی پارتی چەپ و بەرپرسی دۆسیەی کوردە لە وپارتەدا، ھاوکات یەکێک لەدۆستە دێرینەیکانی کورد و خەباتکەرێکی کەیسی کۆمەلکوژی دژ بە کوردانە، کەبەردەوام لە نارەزایەتی و خۆپیشاندانە جەماوەریە کوردیەکان بە شدارە ، ھاوکات ئەمیش  یەکێک لەو ٥ پەرلەمانتارە بوو کە لە ٢٠٠٧/٠٩/٢٣ دا یاداشتێکیان دا بەپەرلەمانی سوێد کە ‌تاوانی کۆمەڵکوژی دژ بە کوردان بە جینۆساید بناسرێت.
 
 ٥.    ئان مارگریتە لیڤە، بەرپرسی پارتی چەپی سوێدی لە شاری ستۆکھۆلم، ئان مارگریتە یەکێک لەدۆستە بەردەوامەکانی کورد‌و وھەردەم لە یادە کوردستانیەکاندا لەناو سوێد و دەرەوەدا بە شدارە وەک نوێنەریکی کورد داکۆکی دەکات.
 ٦.    ئانیا یوسنۆن، ئەندامی پەرلەمانی سوێدەو ماوەیەک ئەندامی پەرلەمانی ئەورپا بووە لەسەر لیستی پارتی سەنتەری سوێدی کەلە دەسەلاتدا بەشدارن. ئانیا بەردەوام لە مەسەلەی تاوانە کۆمەلکوژیەکانی دژ بە کورد داکۆکی کردوە..‌
 ٧.    ئەڤین چەتین،ئەندامی یەدەگی پەرلەمانی ئەوروپی لە پارتی سۆسیال دیموکرات کەتائێستا زۆرترین ژمارەی دەنگدەری کوردی لەم ولاتەدا بەدەستھێناوە کە ‌لە ‌خۆپالاوتنی بۆ پەرلەمانی ئەوروپی  دەنگیان پێدا و ماندوو نەناسانە لەگەل ئازاری گەلەکەی دەژیت وچالاکانە بەشدارە، وە چەندین جار سەردانی باکوری کوردستانی کردوەو ئازاری کوردانی ئەم بەشەی گەیاندۆتە ناوەندە سیاسیەکانی حزب و دام و دەزگا سیاسیەکانی سوێد.
 ٨.     فرێدریک مالم، ئەندام پەرلەمانی پارتی گەلی سوێدی و دۆستی ناسراوی کورد، کەلەزۆرینەی بۆنە سیاسیەکانی کورددا ئامادەیی ھەیە و چەندین جار لەگەل ھاوسەرە کوردەکەی (گولان ئاڤچی) سەردانی باکوور و باشوری نیشتمانی کردووە و لەپەرلەمانیشدا داکۆکیکەرێکی بەردەوامی کێشەی کورد بوە. فرێدریک یەکێک لەو ٥ پەرلەمانتارە بوو کە لە ڕۆژی  ٢٠٠٧/٠٩/٢٣ دا یاداشتێکیان دا بەپەرلەمانی سوێد کە ‌تاوانی کۆمەلکوژی دژ بە کوردان بە جینۆساید بناسرێت.
 ٩.     لارش ئۆلی، سەرۆکی پارتی چەپی سوێدی  کەلەماوەی رابوردوودا ھەواڵەکەمان بڵاوکردەوە و بۆ زانیاری زیاتر دەتوانن سەردانی ئەم لینکە بکەن :
 http://www.kurdocide.com/ku/news.php?readmore=٦٢٦٧
 
 
 کۆمیتەی سوێدی چاودێری کوردۆساید/چاک
 ٢٠٠٩/١٠/١٤
 Chak_swed@yahoo.se
 http://www.kurdocide.com
ژمارەی بینین:  723      بەروار:  
هیچ سەرنجێک بوونی نیە‌ .
تکایە سەرنجەکەت لێرەوە بنێرە  
   

ماڵپه‌ڕی پێشوو ١
ماڵپه‌ڕی پێشوو ٢
    
Copyright 2012. All Rights Reserved.